वेंगुर्ले : वेंगुर्ताले लुक्यातील तुळस घाटी येथे वेंगुर्लेच्या दिशेने जाताना रिक्षाचे ब्रेक फेल होऊन रिक्षा पलटी झाली. यात असलेल्या १० महिन्याच्या बाळाच्या आईला गंभीर दुखापत झाली असून तिला वेंगुर्ला उपजिल्हा रुग्णालयात प्राथमिक उपचार करून गोवा- बांबुळी येथे अधिक उपचारासाठी हलवण्यात आले आहे. तर त्या महिलेच्याच हाती असलेल्या बाळाला त्या महिलेने घट्ट पकडल्यामुळे बाळ सुदैवाने बचावले असून सुखरूप आहे.
हा अपघात आज (९ मे) दुपारी २ वाजण्याच्या सुमारास तुळस घाटी येथे घडला. तुळस मार्गे वेंगुर्ले येथे जाताना तुळस घाटावरील तीव्र उतारावर वेंगुर्ले हद्दीत असलेल्या वळणावर रिक्षाचे ब्रेक फेल होऊन रिक्षा पलटी झाली. या अपघातात रिक्षाचालक रुपेश सावळाराम माडकर रा. दाभोली यांच्यासहित ऋतुजा राजू कुडाळकर वय २६ , रोहन राजू कुडाळकर वय ५ वर्षे (दोन्ही राहणार कोलगाव), आराध्या आदेश साळगावकर वय
२८ व कमलाकांत उर्फ रुवंश आदेश साळगावकर वय ५ महिने दोन्ही राहणार वायंगणी हे जखमी झाले. दरम्यान यात रुवंश या ५ महिन्याच्या बाळाची आई आराध्या साळगावकर हिला गंभीर दुखापत झाल्याने तिला गोवा- बांबुळी येथे अधिक उपचारासाठी दाखल करण्यात आले आहे. तर तिच्या हाती असलेला तिचा ५ महिन्याचा मुलगा सुखरुप आहे. उर्वरित जखमींवर वेंगुर्ला उपजिल्हा रुग्णालयात उपचार सुरू आहेत. दरम्यान अपघात झाल्यानंतर जखमींना सुमारे १ तास रुग्णवाहिका उपलब्ध न झाल्याने त्याठिकाणी आलेले सामाजिक कार्यकर्ते हेमंत गावडे व भूषण आंगचेकर यांनी येथील प्रसाद मराठे यांच्या खासगी गाडीत जखमींना घालून वेंगुर्ला उपजिल्हा रुग्णालयात दाखल केले.
